LA FAMILLE

講起出色嘅連鎖蛋糕店，La Famille 一定榜上有名，除左賣相吸引，食過幾次質素都好穩定，仲不斷推出期間限定款，成日路過都心思思想食。原本想試最新嘅香芋椰子，可惜放工時間去已經賣晒，不過都無阻我食蛋糕嘅決心，一口氣要左五件。店員細心提醒要即日食同打直拎啲蛋糕，可惜返屋企途中架車急停，件榛果咖啡朱古力飛晒啲忌廉出黎唔見得人，所以相入面得四件。

質感方面，佢地嘅戚風蛋糕濕潤度啱啱好，唔油而且有彈力，忌廉幼滑輕盈。

日本柚子:
之前食過覺得可以encore嘅款，忌廉混合左糖漬高知縣柚子皮醬，蛋糕有一絲絲果皮，酸甜清新，最啱夏天食。

日本柚子

$54

香濃開心果:
呢件貴$10所以特別期待，蛋糕有好多開心果碎，連啲忌廉都有果仁味，真材實料，加埋微酸嘅士多啤梨幾夾。

香濃開心果

$65

意式香草奶凍:
香草奶凍滑溜，見到有唔少雲尼拿籽，配原味戚風蛋糕同忌廉，都好食但味道無其他款式咁豐富。

意式香草奶凍

$54

青森蘋果吉士紅茶:
呢件都係近期新作，蛋糕聞落已經好香茶味，食落啖啖都有茶葉碎，深得媽媽歡心，青森蘋果以三盆糖煮過，有少少肉桂味，個餡係唔太甜嘅吉士忌廉。

青森蘋果吉士紅茶

$54

榛果咖啡朱古力:
咖啡同朱古力味平分秋色，仲有粒朱古力脆脆喺面頭，雖然無圖畀大家睇但推薦你地一試！