燒烤堂 (Moved) New Location

同男朋友係旺角行完街，聞到好香既BBQ味，就發現到呢間燒烤堂，個香味真係好吸引，一於就決定食串燒。餐廳位於長沙街，係朗豪坊行過幾個街口就到，好容易就見到。餐牌同酒水單都好多選擇，仲分左唔同既燒烤方式同類型，日式﹑泰式咩都有，而且樣樣都好吸引，價錢又唔會太貴，可以叫多幾串食。而且sapporo 生啤仲有買一送一既優惠，真係幾抵！先叫一個芝士香草蒜蓉包，好香蒜蓉味，燒得好脆，仲有溶左既芝士，好食！泰式鹽焗馬友魚，入面加左香茅﹑香葉，外面就好多海鹽包圍條馬友，魚肉好嫩好鮮甜，聽店長介紹，佢地既魚都係專登每日去街市揀，不時不食，所以咁好食。椒鹽燒七里香，雞皮好脆好薄，有少少軟骨，幾特別。鹽燒豚肉荔枝串，豚肉好薄好脆，荔枝酸酸甜甜，唔會太油膩。麻辣豚肉韭菜花卷，韭菜花好幼嫩，完全冇渣，加埋麻辣粉夠曬惹味。芥末松阪豬都幾好，燒到好脆，入面彈牙又多汁！泰國秋葵串，清新鮮甜，但燒得夠乾，完全唔會有滑潺潺既感覺。最後仲叫多個昆布湯稻庭烏冬，烏冬好彈牙好滑，味道唔錯。平均每人2百幾蚊，價錢都合理，可以下次再嚟！