肥仔記麵食

Open Now

Now Closed

肥仔記真係好鬼多街坊幫襯，食客流量好似車輪轉咁，快上快落，佢哋出名嘅係牛腩，牛孖根，炆得香濃入味，牛腩、孖根夠晒軟腍，所以好多時都聽到D人落單食咩麵都話加腩汁！佢哋另一出名嘅地方，就係抵食，仲要做到絕對係平靚正，唔欺場，單拼麵食先至係$11（雙拼收$16），粉麵份量同出面嘅麵檔差唔多，但餸料就一D都俾得唔會手軟，唔會因為賣得平就將貨就價，依度少D個度又俾少D！好似我哋今次叫嘅孖根米，D孖根放滿晒碗面之上，而碗鯪魚球河同樣鯪魚球一樣堆到滿，足有5粒咁多，仲唔係話會丁咁細粒喎，份量夠晒有睇頭啦！更難得收你個$11碗，質素無賴皮，孖根係鎮店招牌，上面講過唔再提，而鯪魚球做得唔腥，微微蔥香提起鯪魚鮮味，抵食得無話可說！汽水、豆漿$5支，生菜$6碟，不過佢哋獨沽一味賣生菜！仲有，佢哋好似搵夠就收手咁，未夠8:00pm已收緊檔，想哩食消夜依度就無偈傾喇！