濠客蒸氣海鮮 (Closed)

濠客就喺元朗站不遠處, 大約10分鐘就到, 之前有元朗朋友推介, 話食過番尋味, 呢日收工就去元朗食蒸海鮮。喺餐廳門口已經睇到有咩蒸海鮮套餐可以揀, 主要係分三款既套餐, 我地就揀咗中間價錢黃金套餐$288/位。首先店員會先倒米瑤柱南瓜落蒸鍋, 自己就調豉油, 加蔥加蒜蓉係我最愛, 特別提提個豉油好好味💕好快店員就拎咗一人一大盤海鮮, 店員亦會幫助蒸海鮮較鬧鐘, 響鐘就食得, 完全唔駛自己搞好方便。我地揀既餐係一人一隻奄仔蟹, 好大一隻, 而且都有爆膏, 肉質勁鮮甜, 唔駛點豉油都好好味。龍蝦每人半隻, 都幾大隻, 夠新鮮, 一叉就離殼, 啖啖肉, 仲有膏添~貝殼類有鮑魚, 元貝, 貴妃蚌, 象拔仔都好新鮮甜, 由其橙色既扇貝好特別, 我都係第一次。食完海鮮類, 就係蔬菜類, 有粟米, 娃娃菜, 冬瓜同秋葵, 粟米好清甜無渣, 娃娃菜同冬瓜蒸淋咗點豉油好正, 重點佢個豉油好味, 秋葵我就俾咗男人食😂最後當然係吸收哂海鮮精華既粥啦～超好味, 鮮味十足, 店員最尾加埋蔥粒同菜餔都有加分, 食到飽一飽💕