101手工涮涮鍋 (Closed)

前排行街經過門口，午市火鍋套餐只係$48咋！可以揀湯底，三個餸，麵底仲包埋野飲，尖沙咀嚟講算係抵到爛喇掛！食過幾個湯底，暫時覺得最好味係麻辣三杯雞湯！個人嚟講，打邊爐最鐘意嗌辣，咁先食得過癮㗎嘛！而且佢辣得唔過份，食落都唔會好辛苦。配料我嗌左雞脾肉、牛肉、油麥菜。湯底入面包左蕃茄、芽菜同埋粟米等，所以食落都好多餸。雞脾肉大大舊，夠入味又嫩滑；牛肉係茶餐應食開嘅沙爹牛肉，非常軟腍～ 麵條推介大家揀渝川拉麵！佢好似稻庭烏冬咁嘅質地，出面唔係好常見～而且份量非常多，一定夠飽見餐牌推介食麻醬麻辣手撕雞，不過呢個真係有啲失望。。。賣相唔討好，食落係一堆浸滿啲雞嘅麻醬，而且呢碟要加$24，唔抵食加上味道都麻麻。但佢地嘅野飲值得一讚，呢杯珍珠奶茶上面鋪左oreo同埋cream, 唔洗成日都飲珍珠奶茶咁dry咁悶。另外我地嗌多左杯意大利咖啡，味道有啲似mocha，但又唔係超甜個隻，大大杯真係幾好飲！環境同埋坐位都幾舒服、闊落，同朋友敍舊傾計都係一個幾好嘅選擇。