Mee...lemongrass (彩園廣場) (Closed)

喺上水住左二十幾年，經常都會留意一下新餐廳。今次行過彩園見到有間飲品舖做緊買一送一優惠，連住呢間星馬泰餐廳幾吸引，就入左去試。食物選擇多，而且幾抵食！兩個人叫到成枱都係！特別推介呢個小食拼盤包括蝦餅、雞翼、春卷、串燒各兩件及無骨鳳爪，非常豐富蝦餅炸到香脆熱辣，口感彈牙。串燒雞牛各一，肉質軟嫩，蘸上沙嗲醬更惹味。下午茶餐有海南雞飯，套餐有湯、菜、油飯，雞肉肉質幾嫩滑，去咗骨啖啖肉食落好方便。食泰國菜又點少得芒果糯米飯！下午茶餐加$26就有一份。糯米飯微暖，入口煙韌唔黐牙，芒果香甜，椰汁唔太甜啱我。估唔到呢度有台式飲品，要外面買先有買一送一優惠。左邊係火炙芝士黑糖珍珠鮮奶，聽個名都夠曬邪惡！芝士奶蓋同黑糖味道香濃，珍珠有咬口。右邊係東方美人奶蓋茶(下午茶餐加$14)，茶底不錯但奶蓋唔夠厚身。飲返杯水果茶解膩先！四季春茶味清香，加埋唔同新鮮水果係健康之選。