雄泰

Open Now

Now Closed

星期六，食個late lunch。記得之前同屋企黎食過lunch，味道唔錯，價錢又平。果陣叫左好多野，又飯又麵又小食，今次自己黎食就冇得叫咁多樣。睇個menu就見到，大部份價錢係三字頭去到最高四十幾，有d直頭係二字頭，呢個價錢真係平通街。記得之前黎食果陣，有叫海南雞飯，炸蝦餅同埋燒豬頸肉，味道都唔錯。今次我就叫左個鴨肉船河。湯底隻色夠深，味道都的確夠，咸得黎少少甜甜地。配料有蔥花同埋似係炸蒜既野，令個香味同口感都多d。鴨肉切成薄片，份量比預料多唔少，一排有成十塊。河粉係幼身既，滑得黎冇淥得太林，配埋個湯，唔錯。我冇加野飲，所以埋單就係39。環境唔錯，都幾闊落唔會逼。佢平得黎其實份量睇落好似係偏細份d，不過宜家出面食泰國野其實都唔大份得去邊，起碼佢平，你可以試多幾樣野食。