滿堂紅雞煲烤魚特式火鍋 (Closed)

嗰日去開深水埗整電腦，整電腦個師傅話叫要整兩三個鐘，咪係喺附近搵嘢食。行行吓發現咗有間雞煲烤魚火鍋店。望一望個價錢，即刻俾個價錢吸引著，仲要任飲任食添。入到去發現環境好闊落，座位同座位之間分得好開，唔會坐得好迫。湯底有好多選擇，仲有雞煲同烤魚，雞煲同烤魚食完之後，可以點配料打邊爐。飲品有好多選擇，仲有個位置方啲唔凍，真係細心。等個鍋來的時間，可以去攞啲熟食先，款式都唔少，特別推介酸齋，酸味剛剛好，鴨胸都唔錯，煎得好香，沙薑雞腳亦好入味。我地點咗酸菜烤鯇魚，因為兩個人點咗數少邊(即係大約半條)，但係都已經覺得條魚非常大條，條魚煮好滑一啲腥味都冇，酸菜味道比條魚同豆卜吸收晒。打邊爐點都要食啲肉，肩胛肥牛切到好薄，灼一灼就食得，入口即溶，而黑豚肉片，食落都好嫩滑。任點食物款式有77種，當中竟然發現有花膠，花膠口感一流。食物本身已經好新鮮，仲洗得好乾淨，一睇個鵝腸就清楚，鵝腸非常爽口。紅薯粉同炸魚皮，紅薯粉爽口彈牙，魚皮炸得好脆，放左落個湯度吸晒個湯啲精華，好夠味。仲有任食韓國雪條，仲有好多種味道添，我最鍾意蜜瓜味。最後埋單時發現呢個價錢竟然仲要唔使加一，好抵呀。