福苑火鍋海鮮酒家 (Closed)

靚女C介紹呢度食大閘蟹只係$38，而且海鮮好味又抵。當造季節，一個月左右去咗3次，每次去啲大閘蟹每隻至少4.5兩仲要爆膏。聖子$78有4隻鮮甜爽彈。豉油蝦$78肉實淨超級惹味份量多。龍蝦烏冬啲龍蝦幾鮮味。蒸鮑魚、扇貝略細蒸得略過火。炸嘢出色：炸鮮奶、炸生蠔、炸魷魚鬚、炸九肚魚全部冇過油又外皮鬆脆。前菜小菜如海蜇青瓜、南瓜芋頭煲、京都骨、粗齋煲、片皮鴨、滷水鴨舌幾好。腩仔唔熱唔脆可不試。每次食海鮮小菜每人約$200內。後嚟呢區亂亂哋，我哋就轉咗場去同集團嘅“金都國宴”lu。