新華苑酒家

Open Now

Now Closed

好耐冇食過海鮮蒸氣火鍋啦，咁啱朋友推介呢一間餐廳， 一於一齊試一試！呢度嘅蒸氣火鍋係可以選擇四款海鮮，其他肉類、丸類、蔬菜類就任食！同其他蒸氣火鍋一樣，一開始都要選擇一個粥底，之後蒸火鍋嘅時候，海鮮嘅鮮味就會落入鍋下嘅粥入面，我哋就揀咗南瓜排骨粥！而海鮮方面，我哋就嗌咗蟶子、大元貝、鮑魚、象拔蚌。蟶子非常鮮味，配合蒜蓉、粉絲等等作為調味，鮮味之餘亦非常惹味。而且蒸嘅時候，店員會幫手調教好時間，所以就唔驚自己蒸，整到過咗龍啦！大元貝亦都好出色，粉絲吸收晒蒜蓉嘅香味，以及大元貝本身嘅鮮味，而且店員調校嘅時間啱啱好，蒸出嚟唔會過熟，唔錯！鮑魚亦都唔細隻，用薑片蒸煮，更能帶出鮑魚本身嘅鮮味，而且識落唔會好靭，唔錯！象拔蚌好正，上枱嘅時候已經剪好左，方便食用。象拔蚌食落亦都非常爽口，推介！食完海鮮之後，仲可以點其他肉類同埋蔬菜，每款蒸煮嘅時候都會為鍋底嘅粥底加多一份鮮味！我哋最鍾意就係蟲草花蒸雞同手切和牛肉，蒸雞唔會有雪藏味，反而有好香嘅酒味。而且和牛肉好嫩滑，我地食左好多片！最後食埋個南瓜排骨粥，粥煮得好綿，而且無需任何嘅調味，單靠之前海鮮同埋蔬菜嘅鮮味已經非常好味，食埋呢個粥就真係好滿足啦！