龍鳳祥餃子館 (Closed)

今日去左深水埗陪朋友買手作材料，之後一齊去左西九龍中心食午飯。一上電梯到三樓就見到龍鳳祥餃子館，之前食過佐敦個間，覺得好好食所以決定試埋深水埗呢間。面積比佐敦個間大，餐牌就一模一樣。見到店員一直包餃子，隻隻都脹卜卜充滿餡料，而且肯定新鮮。我地要左一碟細既雞絲粉皮，超足料，雞絲係粗身，加上大量青瓜絲，而且麻醬亦調味得非常好，$20真係好抵食。到主角餃子，要左一碟湯餃，一碟煎餃，2種都要左雙拼，一次過可以試4款味道！湯餃要左肉三鮮拼京蔥羊肉餃。肉三鮮入面有韮菜，豬肉同鮮蝦，三樣材料比例岩岩好，而且原隻蝦都新鮮。京蔥羊肉餃比較濃味，但羊唔會太羶，加埋京蔥好香。到煎餃，完全冇油益味冇油膩感，而且餃子皮煎到好脆。我地要左蕃茄蛋餃拼韮菜豬肉。韮菜豬肉其實同肉三鮮一樣味，只係冇左隻蝦，一樣好濃韮菜香。蕃茄蛋完全唔會水汪汪，炒蛋蛋味濃，清清地，好好食呀！最後要左杯豆漿，好濃郁既豆味，又唔會太甜。總括黎講呢度同佐敦個間一樣有水準，而且非常抵食。