Running 燒 (Closed)

再次同朋友黎食韓燒，抵食又好味！午市、晚市7:20pm前結賬、或9:30pm後入座，都做緊7折優惠，今晚計番每人都只係$175，就可以任燒各款海鮮同肉類。海鮮種類非常多，有生蠔、扇貝、帶子、大蝦、燒酒蝦、多春魚、魷魚鬚、魷魚圈……落單之後，好快就送上黎，擺盤有心思，睇上黎好新鮮，樣樣都大大隻，輕輕燒熟一食，好爽口清甜。牛肉有肥牛，薄薄地，好快就燒熟，肉汁好香甜。其他部位好似牛肋骨、牛柳粒都唔錯，醃咗少少，但唔會搶去牛肉原來嘅味道。豬肉特別推介豬頸肉、豬腩肉，肉汁非常豐富，而且好厚，好有口感。雞肉有調味雞肉、辣味雞肉，調味果款有少少鹹，辣味果款就剛剛好。羊肉有羊脾、羊西冷，我比較少食呢啲部位，原來係咁好味，唔會好膻。燒到咁上下，可以叫啲粉麵飯同小食。我叫咗一份炒年糕，好煙韌，個辣醬好濃郁，之後用黎做燒肉嘅蘸醬一流。又叫咗柚子味炸雞，甜度適中。最後有甜品，我揀咗椰子雪條，燒完野食食啱啱好。中途想飲飲品可以係櫃度任拎，可樂、汽水、水果茶……非常抵食既韓燒放題！