新泰東南亞餐廳

Open Now

Now Closed

放工同先生喺尖沙咀覓食，俾呢架色彩鮮艷嘅Tuk Tuk吸引住，一睇就知道係食泰國菜，門外亦有唔少人等位，似乎唔錯。餐廳位於地牢，地方非常大，仲有幾間包廂，而且座無虛席。食泰菜當然唔少得蝦餅，先生提議嗌呢道烤蔗蝦，好有新鮮感，用鮮蔗串住蝦膠，香口彈牙不在話下，加上淡淡嘅蔗香，唔錯。冬陰功亦有驚喜，味道香濃，酸辣度適中，材料亦算豐富，有大大隻蝦同唔少鮮菇，連平日對冬陰功要求極高嘅先生都大讚。馬拉盞炒通菜加入蝦米同肉碎，鹹鮮惹味，通菜亦保留到爽脆嘅口感，水準頗高。金邊粉炒得夠香口，用蛋網包住，口感微微濕潤，味道夠哂地道，仲有大大隻蝦仁，如果配搭埋辣椒粉就更點睛。咖喱軟殼蟹配上用牛油烘過嘅麵包，係完美嘅配搭，而且份量非常多，三四個人食都唔係問題。軟殼蟹炸得酥脆，入口仲有淡淡嘅蟹膏味，味道鮮甜；黃咖喱香濃細滑，而且椰奶味夠重，配搭軟殼蟹就最合適不過。除咗軟殼蟹之外，麵包亦係另一重點，麵包質感軟熟，搽上牛油之後烘至表面微脆，沾上咖喱一齊食，令人滿足！而且咖喱份量好多，即使成件麵包浸落去亦絕對足夠，非常邪惡！今晚每道菜式都令人滿意，味道夠哂地道正宗，而且價錢合理，難怪市道唔好依然人氣爆燈。