樓下冰室 (Closed)

係荃灣唔知想食咩，嚟路德圍就實無死。哩到聚集左各式各樣嘅餐廳同糖水店，行過想食咩就食咩。今日試下哩間新開嘅“樓下冰室”，裝修係好似懷舊茶餐廳。以蕃茄為主打，好似蕃茄濃湯麵、蕃茄焗意粉、蕃茄焗豬扒飯等。叫左個午餐同下午茶餐食。普通嘅午餐係跟脆豬同炒蛋，但為左一試瑞士汁雞脾，所以食$46餐。蕃茄濃湯螺絲粉配牛乳炒蛋都幾大碗，蕃茄湯就唔係濃湯，相反係清甜，味道幾似主家味，有蕃茄粒。去茶餐廳食總係味精多，因此嚟一碗鮮茄麵，感覺健康d。 招牌瑞士汁雞脾果然係招牌。雞脾肥大厚肉，肉質都算嫩滑，而且皮薄，無太多肥膏。瑞士汁味剛好，甜甜地，令人忍唔住一口又一口地咬。而且雞脾醃得入味，唔洗點太多汁都夠哂味。見在埸不少顧客都用手拎起食，果然食雞脾都係用手先夠滋味！可惜下午茶餐就相對失色，無蕃茄食物選擇，而且計返個價錢無食常餐咁抵。 厚切牛乳炒蛋治好大份，哩份三文治應該至少用左三隻蛋。不過炒蛋並唔香牛乳味，甚至連蛋味都欠奉，炒蛋又唔夠滑，實在令人失望。 另外，餐茶可以揀自家製羅漢果茶，清下濕熱肝火。雖然個蛋治唔得，但個蕃茄湯同瑞士汁雞脾都可以一試。