囍 (Closed)

原本打算約友人去apm食飯，但放工時實在太多人，友人提議去工廠區嗰邊打邊爐，唔駛等位，又坐得舒舒服服，我當然話好啦! 去到餐廳，竟然都有8，9成滿，好彩 walk in 都有位。火鍋放題揀咗B餐$138，貪佢豬牛雞都可以無限添加，湯底要咗黃金雞木瓜椰子湯，其他食物都係自助，醬料嘅選擇非常多，連蒜苗粒，貴州干媽醬都有。但飲品，食物嘅種類都係大路嘢，唔算特別，雪糕似人工合成味道，仲夾雜冰碎，唔得。湯底唔係好食得出椰子味，黃金雞反而有驚喜，見佢似係普通雞件，食落先知佢醃得好入味，幾好食，但味精就落得重手咗少少，食完有啲口渴。另外，豬肉係普通貨色，無咩味，牛肉中央同邊位有啲黑色，我哋都唔敢食，所以豬牛雞我哋無再追加，早知叫A餐都夠食，仲要平啲。雖然門口寫明用餐時間係90分鐘，可能係平日關係，我哋坐咗2個鐘都無人催我哋走，而且店員會主動換碟，值得一讚。