Hami Harmony (Closed)

星期六下午去完花墟買花，嚟到呢間cafe見裝修好清新舒服，裡面又坐滿客人，應該唔錯，便入去試試。好好彩，剛好有張望街又自成一角嘅四人枱，我地坐得舒服之餘又可以望到街景。午餐有好幾款，我地揀左7oz. 牛扒同All day breakfast 另外加多份雞翼配芝士醬牛扒好大份，有牛肉味又juicy ，黑椒汁唔會太鹹，幾好。薯條份量多又熱。All day breakfast 有驚喜係焦糖脆面嘅香蕉，仲要係原條。另外佢嘅迷你流心牛角包都有兩個黑松露炒蛋，我比較欣賞佢唔太香，感覺唔落太多牛油，佢夠清香蛋味好似健康少少。雞翼配芝士醬不過不失，但5隻雞翼裡有一兩隻特別細，感覺唔會太好，如果佢嘅雞翼比較大隻少少，應該會好啲。咖啡無咩特別，但價錢相對唔貴。呢間cafe 食物質素整體唔錯，價錢又唔貴，又無限時，空間感又唔太逼，可以消磨一個下午，係一間會回頭嘅cafe。