Hero's Friday (Closed)

呢間Hero's Friday係荃灣新開既分店，聽聞荔枝角分店好食，於是今日喺荃灣就專誠去試一試，門面清簡整齊，右邊仲貼心有四張櫈，可以比人買咗喺度食，不過都係要用外賣紙袋，其實可以唔用紙袋，可以環保啲。暫時只收現金，堂食中途都好多街坊嚟買外賣。呢間店有首創將漢堡包用班戟取代，好新奇🤩，所以專登嚟試下，我揀咗豬柳蛋班堡，$48包埋汽水🥤同薯條🍟。大概等咗都係十分鐘左右就出餐啦！我比滿瀉既薯條吸引，新鮮炸起真係好難唔好食，收到即刻食返幾條先！不過啲鹽就唔係灑得好勻，所以食到底愈來愈咸。至於主菜個豬柳蛋班堡🍔，兩塊鬆軟既班戟，食落反而有少少甜甜地，芝士同豬柳就無乜特別，而個炒蛋真係唔錯，成熟度啱啱好仲有蛋漿流出，又夠晒足料，好飽肚！不過本人覺得配班戟有少少怪，因為蛋、芝士、豬柳都係屬於咸既，而個班戟甜甜地咁有啲漏，又咸又甜有少少奇怪，但都係個新奇既嘗試！好評絕對係比個薯條同炒蛋！下次會試下佢其他漢堡，見到大大份都係賣$6/70度，幾抵食！不過真心薯條漢堡真係要堂食先好食，拎返屋企始終爭啲，除非真係住好近啦！