飲茶‧私房菜 (南豐大廈) (Closed)

是日同朋友仔食生日午餐，友人揀咗南豐中心嘅飲茶，小女子我當然無意見（因為我係個group到一直潛水，sorry）其實我真係對依啲食物咁精緻盞鬼嘅新派茶樓無咩興趣，當然食物名係噱頭，例如：睇住流奶，污糟拌麵（點咗，細細碟，上菜時就有啲：下，就係咁，普通簡單都唔想post）；而味道當然都佔大半；所以今日純屬諗住唔好味番公司就食幾塊餅乾頂肚。朋友訂咗枱，所以都係等咗陣就有位，裝潢設計都幾潮，陽光光猛，位同位之間都唔會太近，坐都坐得舒服。容許我無對依個睇住流奶點樣，我知好多人鍾意吉個窿係前面或後面黎營造唔同效果，但，我真係做唔出🙈，我就正正常常一開二，同朋友share。個飽都算係咁，係流「奶」，但就欠缺奶黃/奶味，即係食緊個流汁嘅飽（明啦）而個對眼就係棉花糖做嘅，第一次試食～還可以啦！中環區，比起其他新派飲茶，依間價錢味道裝潢絕對合理，所以成日都好爆，可以的話就最好打電話訂枱先；同埋記住小心傾計呀，事關價錢/位置/味道都令依間餐廳成為人氣之選，真係好容易撞到公司同事（我就撞到😒）