米線哥 (Closed)

今日又去米線哥食lunch，估唔到有新驚喜 - 出左新嘅蕃茄湯底🍅！poster講到明啖啖🍅肉不得止，仲可以加辣度！咁就一於試試佢！撞啱promo，叫左個茄湯大辣雙餸（雞肉同金菇）+飲品加購價再半價（本來8蚊變4蚊）嘅套餐，加埋都係45，抵呀！米線等左5分鐘到米線就上枱，以星期日午市咁忙嚟講都咁快上枱係抵讚嘅。一上枱就見到一堆茄肉係碗粉中間，攪勻之後成個碗都係茄肉，真係啖啖都有，係講得出做得到喎！湯底方面，唔算係茄湯專門店好鮮嘅蕃茄味，係有加茄膏，但整體唔會因為只有茄膏而死咸。辣度方面由於我揀左大辣，有少少喧賓奪主，個辣味冚哂茄味。反觀我朋友嘅BB辣茄湯就無呢個問題，所以嗜茄一族都係唔好揀咁辣會好啲，balance 返。餸方面，雞肉都係一貫嘅雪雞但無乜雪味又無乜肥肉，可以接受；金菇為索湯而叫，無特別，不過不失；米線彈牙唔會太淋，正常發揮。結論係茄湯係正嘅，不過本人極度嗜辣仲要撞正入冬，應該都係回歸麻辣湯盡興啲🤣