川．粵居 (Closed)

同屋企人揸車去飲茶，今次揀左高埔村，貪嗰度免費泊車😝 呢間川粵居主打新派粵菜，點心造型又可愛😍 裝修幾好，光猛新淨，圓拱卡位適合大班人坐。服務殷勤，有問必答，上菜速度都算快。天鵝紫霞雀籠點心鳥籠造型好吸睛，一上台小朋友已好興奮。天鵝🦢係炸得酥脆嘅芋角；中層紫霞係奶皇紫薯煎堆，脆口又有奶皇香，用乾草墊底望落似鳥蛋 🐣；下層麻雀千層糕🀄️ 面頭個發字夠盞鬼，仲有燒賣、蝦餃各2件，鮮蝦彈牙，味道唔錯啊。雜菌煎米粉餅米粉煎得香口唔油膩，入口唔鬆散，配上羅漢上素嘅茨汁，人多不妨試下呢個主食。紅菜頭野菌餃粉皮透薄，入面係爽口清甜菜蔬，感覺清新。齋腸同鮮蝦腸都係工整上枱，軟糯又滑口，小朋友飲茶必點。仲有鳳爪同馬拉糕，一家大細飲茶真係最舒服😌全4星🌟