御の味 (Closed)

今日中午個人攰攰地，天氣又熱，成個人都好躁，最啱就係食壽司啦😋同朋友揀咗呢間門面裝修好靚既日式居酒屋，卡位闊落，燈光微暗，好適合同三五知己喺度傾計。一坐低，就留意到餐具設計有小巧思，筷子托直接用一個蜆殼，好有創意👍🏻一睇menu真係花多眼亂，一時間唔知叫咩食好，呢個時候餐廳侍應就推薦咗廚師發辦套餐比我地，師傅會將當日最新鮮既海鮮整成壽司。最後我地叫咗一個廚師發辦套餐，同埋一個日本地雞定食。👍🏻廚師發辦12貫壽司套餐（包烏冬、前菜、沙律、甜品）🍣一上枱已經見到每件魚生都好鮮美，擺盤非常之靚，好吸睛！鰻魚好大件，食落油脂溢出，好滿足！玉子好有驚喜，同平時食既玉子唔同，食落有層次，蛋香重，亦唔會太甜。12款壽司既飯都落咗少許醋，食完12件都唔會好滯，加上有少少炙燒，食落有焦香味。👍🏻日本地雞定食（包米飯、味增湯、茶碗蒸、前菜、沙律、甜品）🐔店舖用上日本直送地雞，雞扒煎到表面焦黃，雞皮咬落好脆，肉質鮮嫩，唔會煎到太老。茶碗蒸出色，非常滑之餘，裏面仲有大大粒帶子。配埋柚子醋沙律一齊食，感覺唔會太heavy。🍦食到最後已經好有滿足，原來最後驚喜喺個雪糕度！而家只要讚好店舖FB同IG，就會獲贈雪糕。