皇后冰廳 (Closed)

喺荔枝角行街之後，朋友建議去長沙灣嘅皇后冰廳食飯，食完覺得都幾有驚喜。餐廳重點推介生蠔同焗蠔，見佢嘅精選法國生蠔只係$20一隻，仲要買五送一咁低，於是就要咗六隻試吓。上枱見到隻隻生蠔睇落都真係好新鮮，雖然唔算好大隻，但係食落好鮮甜，一啲都唔腥，鍾意食蠔嘅一定要嗌嚟試吓。主菜要咗一個鮮茄焗豬扒飯，賣相好靚，聞落都好香。豬扒嘅份量都幾多，食落唔會好乾。啲飯係炒飯，夾埋啲芝士同茄汁一齊食，甜酸度啱啱好，真係好正。另外叫咗嗰藍青口海蝦天使麵，同樣都係賣相超靚，總共有三隻藍青口，同埋兩隻海蝦。青口都算幾大隻，海蝦爽口彈牙。天使麵軟硬度適中，個人好鍾意佢個汁，香口得來唔會太鹹，成個配搭好好。跟餐加錢要咗沙律同埋餐湯，沙律嘅份量都幾多，沙律菜好新鮮，配埋麻醬好開胃。餐湯係蘑菇粟米忌廉湯，入邊有好多蘑菇同粟米，飲落唔會太稠又唔會太稀，好好飲。睇相見到佢嘅芝士磨菇釀雞翼好似唔錯，於是叫咗兩隻嚟試吓。上枱見到兩隻雞翼都好飽滿，賣相真係一流。切開入面又見到好多芝士同埋蘑菇，芝士唔會太鹹，同蘑菇、雞翼一齊食，真係好正，下次嚟嘅話都一定會再食。