豆花先生 (Closed)

最近見有賣芋圓嘅舖頭都會試下，今日去開葵芳，突登去試下雜誌介紹嘅豆花先生。雖然有雜誌介紹，但我都唔敢帶住期望去試，因為之前都中過幾次伏。 去到葵涌廣場，都知會多人，不過原來唔係排豆花先生，而係排附近其他食店，但都差啲迫死。好，點嘢食，無人排隊，一男一女店員都算有禮貌，我點咗個招牌豆花，有芋圓，地瓜圓，粉圓，紅豆加豆花。無特別吩咐少甜，女店員負責裝豆花，男店員收錢，豆花好快到手，$28份量唔多，可以接受到，但無得坐得食黎講都算幾貴，如果唔係想試，我寧願飲兩杯珍珠奶茶。由於係附近太迫，行咗一分鐘去個無咁多人嘅位置立食食，黎得涌場預咗。食咗一啖先記得影相，本身碗嘢個樣都ok，係細碗啲。講下碗嘢⋯⋯無味。豆花唔甜，無乜豆味，尚算滑溜。芋圓同地瓜圓粉量一般，但係令我好失望係，無芋味，唔甜，又唔QQ，好似食緊方形染咗色嘅無味嘅糯米團。粉圓細細粒無乜存在感，紅豆又係無味，唉，無下次。係葵涌廣場大把嘢食選擇，比啲誠意好唔好？