麥兆記(祖傳)廣州雲吞麵 (琉璃街)

Open Now

Now Closed

一直知道麥乜麥物的麵店都好有名（但係我都係唔識分），最近有緣喺果邊返工，知道有兩間麥乜麥物，今次先試食這一間，下次再去轉角試吓。平日路過總係感覺個店無咩人幫襯，見佢無對外標價錢，我望一兩眼就會繼續行，但係今日喺公司睇到魚蛋粉麵的外賣紙，勾起我想食雲吞麵的癮，就想起正正喺樓下的麥兆記。網上睇食評大半都話佢唔係真係咁好食同埋好無禮貌，我本來都係抱住中伏的準備入去。入到去原來都幾好生意，都滿人。店員姐姐其實又唔係網上講咁無禮貌，姐姐們都好友善，我唔想搭檯都無逼我，又無逼我坐細檯。無錯的確唔係四五星級的禮貌和服務，但亦無網上食評講到咁差，點餐時係一呼即應的，叫咗一個牛腩麵同埋蝦子雲吞撈，好快就有得食，都唔洗點等。味道無網上講到咁不外如是，可能我窮，平時食食埋埋街邊牛腩麵雲吞麵唔識野所以我會覺得麥兆記好好食。