囍滿庭海鮮酒家 (Closed)

係紅磡區我最喜愛既酒樓，無敵大海景，多款食品選擇，出品質量穩定，仲有好多特別菜式，唯獨服務要加把勁改善喇，包括廚房都係 ~ 因為公司係附近，工作原因，所以多數都只會係度食午飯，早茶或晚飯機會微啲 ~ 因午市實在非常多人，最好訂定枱喇 ﹗但稻香開左之後，已搶左部份食客，但依然經常爆場 ﹗脆皮燒腩仔，差不多每次都叫既小食，皮脆、肉香、肥瘦平均，good ﹗點啲芥辣更能提升咸香 ﹗四川口水雞，好香、微辣，雞肉都嫩滑，幾好 ﹗但只用雞仔做，無咩肉食，主要都係過吓口癮。本人嗜辣，老實講我完全感覺唔到，只有啲花生香、辣椒香。白烚白菜苗，好普通既一味，無咩特別，清清地，點豉油食，菜嫩口。炸明蝦角，好香口，蝦彈牙、味鮮，配沙律醬酸酸甜甜，好開胃 ﹗水晶蝦餃，皮薄餡靚，大大隻蝦仁、爽口彈牙，少量肥豬肉帶出香味，無肥膩或散筲筲口感，非常好。灌湯小籠包，好功夫，豬肉汁豐盈，飽內滿載湯汁，放係醋上面，令小籠飽稍為降溫，就成隻啪入口，飽皮、肉汁、豬肉混在一起，好有層次，勁好味，如跟上海老店比較已做到超水準 ﹗