客家爺爺 (Closed)

推開門見到一個高大威猛，貎似王力宏的男經理歡迎，好NICE。我們已決定選蘿蔔丸子$42，這裏出名，白白雪雪，外面堙堙靭靭粉包着白蘿蔔絲，幾清，不負所望。正考慮選甚麼雞，靚仔經理推介霸爺雞$$118，唔得，肉質部份OK，但部份好鞋及老過阿婆的肉，差咗，失望，同區牛記茶室及桃花工房的雞滑好多。西施梅菜扣肉$88，少汁，廋肉唔夠淋及化，又唔多汁，我個人喜歡龍門酒樓及灣仔醉瓊樓比較好些，可能適合OL，做法唔想太肥。爺爺糟汁炒米粉$92，唔錯，有芽菜，其他甚麼料已唔重要，主要是酒糟炒，好有酒味，不過差不多一百食炒米粉，值唔值見人見智。馬拉盞蝦醬唐生菜煲$78，不夠蝦醬，此菜都是在大排檔及茶餐廳，先致掂，先致夠臭。涼瓜芙蓉$72，蛋白與涼瓜撈埋一起，幾清，幾特別。最後，有糖水送-綠豆沙，無臭草唔夠香，綠豆唔起沙，好似加粉，唔係咁喜歡，靚仔經理問有甚麼意見，他說糖水無加粉，他說會跟廚房提意見。這裏的菜以清淡為主，價錢在此區算合理，雖然唔係每樣都喜歡，但以環境及地點在加上有靚仔經理，我會給他笑。