無肉食 (My Central) (Closed)

每隔一輪我就會同家人或者朋友嚟中環呢間蛋奶素自助餐廳盡情食一餐。未嚟過你想像唔到，就算冇雞魚肉冇海鮮竟然都可以食得好開心好滿足。呢間無肉食餐廳係L型格局，對住門口最埋邊仲有一間典雅別致嘅包房（另加100蚊可包房）。成間餐廳嘅設計係木系簡約feel，隨意得嚟都舒適，幾啱開飯。一入門口就可以畀咗錢先，晚飯按人頭每位139蚊，唔使服務費（嚟親都覺得佢哋好有禮貌）。午餐同下午茶再抵啲，不過晚飯嘅款式多啲。好欣賞呢度有專門洗手區，可以食飯前後或者隨時需要都可以洗乾淨隻手。食物案種類分區擺放，大致有：涼菜沙律、炒煮熱菜、香口炸物、炒粉麵飯、湯水飲品、甜品水果......食材新鮮，出品都頗講究，整體味道不俗。各款菜餚按需求時時更新，周不時食到啲新口味。如果經常嚟食，會發現呢度有唔同嘅食譜，時時轉款。既然係自助餐，唔爭在自助埋最尾自己執碗碟呢一步啦~最緊要係慳到成本回饋食客，抵食。因為食物花款多又好味，素食都可以令到你眼花繚亂、眼闊肚窄，分分鐘起到自助餐嗰種令人食到扶牆而出嘅效果！