Tipsy burger (Closed)

今次真係唔寫食評唔得，因為個天婦羅素菜漢堡真係超超超級好食，仲要大件夾抵食。呢間漢堡店之前開張嗰時，我已經嚟試過一次，因為我本身唔飲酒，所以上次揀咗無酒精嘅和牛漢堡，新鮮熱辣辣又足料，塊和牛大大塊又多汁，都好正好好味。今次再嚟發現加入咗一款新漢堡，就係天婦羅漢堡，呢款漢堡都係無酒精嘅，所以我就決定試下。一試之下真係超驚喜，真係好好味！漢堡入面有好多材料，有茄子、金針菇、啡菇天婦羅，外脆內多汁，配埋紫菜同埋微甜嘅芝麻醬，真係超正呀！小食方面，都係一貫出色，同朋友一齊叫咗忌廉芝士蘑菇釀雞翼、芝士醬薯條同蕃薯條，全部都好味。大推釀雞翼，惹味之餘內餡又creamy，食唔停口呀！另外嘅薯條同蕃薯條都幾香脆好味，不過份量對我嚟講真係太多。整體嚟講，真心值得推薦，漢堡店嚟講真係有水準得嚟又抵食。