醉翁亭火鍋館 (Closed)

有個鍾意食火鍋嘅朋友，每次聚會都係要食火鍋，話咁會開心啲喎，真係咩季節都要陪佢食火鍋，冇計。今次揀左食觀塘嘅醉翁亭。 無限時任飲任食，星期一至四 $298一位，餐廳facebook仲有coupon，show個圖就可以位位減$30呀。一版係一次性項目，一版係任食項目，實行食到捧住個肚走。睇下一開始幾大堆頭！先食個刺身開開胃，全部都夠新鮮，冇乜雪味。湯底可以免費揀精選鍋底，好吸引喎。 揀左川芎白芷大魚頭鍋，奶白色嘅色湯，散發住獨有嘅濃郁藥材香味，好正。極級牛頸脊二人嚟講份量非常多，如果出面餐廳散點，呢碟起碼都要$300，牛肉味濃，油脂豐富，靚嘢嚟。蠔皇金錢花膠，咁巨型嘅花膠扒，一啖入口夠滿足。環球海鮮盤有7款海鮮，每款都勁新鮮，完全無挑剔。至尊水餃皇每位只有一隻，皮薄餡靚，係珍寶級size，一咬開，裏面啲餡多到爆出嚟，一口係食唔得晒架。任點項目我推介：美國雪花肥牛，好厚身，又有牛味。必點嘅係鱔，厚切、彈牙、爽口，回本之選！出面仲有啲小食同糖水，yummy！食物味道確係唔錯，價錢合理。 最重要係無限時，可以慢慢食慢慢傾計，開心一整晚。