麵屋一京 (Closed)

麵屋一京🍜麵店由日本師傅親自主理，湯底主打豚骨醬油，喜歡濃味嘅可以選擇背脂豚骨，而叉燒亦有分普通鹵叉燒同真.叉燒(即慢煮叉燒)，我比較喜歡濃味所以揀左豚脂醬油真.極上拉麵，湯底雖然加入背脂但一啲都唔覺油膩，入口好香豚骨同醬油味道，有層次感，而叉燒因為係用慢煮方法所以可以保留豬肉本身新鮮嘅色素，其實係熟㗎，我知好多人都未必接受到血紅色嘅叉燒放入口，但慢煮叉燒其實已經係一個潮流，好多地方已經用左好耐，只係香港人唔係咁多人接受所以好多拉麵店就算用慢煮方法煮叉燒都唔敢煮得太紅，大家真係放心去試下啦，講完叉燒到拉麵，拉麵用上粗直麵，麵質爽滑唔錯，而半熟蛋亦做到流心效果，價錢$108雖然感覺比較貴，但香港始終舖租同人工貴所以我覺得價錢都算合理嘅，好多人都會話香港拉麵又貴又唔好食，情願去日本食，我都知日本嘅拉麵好食，但唔通每次想食就飛去日本食咩，其實香港都有好多好食嘅拉麵小店，佢哋都係好用心去煮每一碗拉麵比客人。