一鳴丼食堂

Open Now

Now Closed

大埔火車站附近啲小巷有好多好嘢食，今次就嚟食咗一間日式野一鳴丼食堂。無論係個門面設計定係內裏裝修都非常日式，鋪面唔大，位置都唔多，但係幾溫馨，有啲深夜食堂嘅感覺。佢店入邊仲有啲手寫牌仔既時令推介，感覺幾特別。餐牌睇落主打係丼飯，亦都有刺身串燒同壽司。熟食嘅牛肉，豚肉，生食嘅刺身，都有幾多選擇。我哋叫咗一個炙燒牛肉飯（$138）同三文魚火山（$118）。一上碟個size比我想像中細，但食落其實都好足料，牛肉多，亦都好嫩，上面仲有隻流心蛋。基本上可以每一啖都有肉，非常滿足。三文魚火山嘅拖羅蓉堆得好高，刺身份量唔係特別多，但係食得出配料幾新鮮。另外仲叫咗個油甘魚壽司（$35）。呢個油脂分布好均勻，塊刺身亦都切得好厚，個人幾鍾意食呢一碟。飲品方面叫咗一杯白桃一千零一夜（$32）。大概係有少少酒精嘅白桃加薄荷葉梳打。野飲相當大杯，唔太甜但係好清新，無論配甘味重嘅魚生飯定係惹味嘅牛肉飯都非常開胃。總括來講我覺得呢度嘅環境，野食，水準都唔錯。夜晚約兩三個嚟食飯飲嘢傾偈係一個好唔錯嘅選擇。