一糖 (屏山)

Open Now

Now Closed

朋友介紹喺天水圍西鐵站後面有一間隱世嘅甜品店，佢話嗰度嘅氛圍直情好似去咗日本咁，呢輪因為疫情餓咗咁耐，就即刻去試下，離開天水圍西鐵站行經一條小路之後就係一糖，都只係需要幾分鐘，十分方便，去到見到呢一幅咁有日本 feel 嘅水泥牆就係喇。一糖除咗窩夫、綿綿冰、即撞豆腐花、香蕉船、心太軟同沙冰等等之外，仲有好多款中式傳統甜品， 帶埋屋企嘅老人家嚟都啱食。抹茶椰汁紅豆冰，呢個椰汁紅豆冰絶對勾起我嘅童年回憶，但係一糖加入咗抹茶同埋雪糕，傳統之餘亦帶點創新，紅豆煮得夠腍而唔會太甜，係我最鐘意嘅味道。由於有少少肚餓，食甜品之前嗌少少鹹嘢嚟頂下肚，估唔到呢度連魚蛋燒賣腸粉都咁有賣相，呢度嘅魚蛋相當高質，有陳皮味之餘亦都好有咬口，腸粉亦都好滑溜，淨係嚟食呢碟小食都已經值回票價。 Mocha 脆脆麻薯窩夫，呢度嘅窩夫最大嘅特色係窩夫裏面係有麻薯夾心嘅，外層脆卜卜嘅窩夫裏面包住嘅係軟糯煙靱嘅麻薯，唔係咁多地方食到窩夫有咁嘅雙重口感，淋喺面頭嘅朱古力糖漿、棉花糖同白色嘅糖霜都為呢個甜品生色不少，一啖脆脆嘅麻薯窩夫，一啖曲奇雪糕，夫復何求。