Shine (Closed)

太子集團大廈有好多好野食，成日嚟呢度搵食，今日咁啱又想食吓西餐，就搵到呢間餐廳。Main course選擇都唔少，有羊有豬有牛有龍蝦、另外又有Pasta、Risotto、前菜、小食同甜品。等左一陣，三重芝士薯條上桌，同出面餐廳嘅芝士薯條唔同，唔係成撻芝士放喺面，反而佢係有少少溶溶地溶入左薯條入面咁，以為好淋，點知又唔算，芝士味好濃，薯仔味亦重，食到停唔到🤣之後就係黃金手工蟹餅配秘製酸辣醬。個蟹餅都幾高身，以為好多炸粉，點知一切開係勁多蟹肉，外脆內軟。而且搭配埋佢嘅秘製酸辣醬，又真係好襯好開胃，十分推薦！然後到黑松露軟殼蟹意粉。好鍾意啲食物樣樣都熱辣辣，感覺唔係整定哂咁。黑松露好香，意粉唔會煮到過熟，口感剛剛好。軟殼蟹size都唔細，炸得香脆又可口！最後就係脆炸咸豬手配蜜糖芥末醬，呢個算係等得比較耐，不過食完又真係覺得值得等。我食過好幾間德國豬手，一係就係啲肉太靭，一係個皮脆到硬，但呢個豬手整得好出色。佢啲肉唔靭，啲皮雖然用刀切唔開，但用牙係咬得開，脆卜卜咁，好好味！食完飽到上心口🤣間餐廳樣樣都好食，而且員工嘅服務態度亦都好好，會主動同有禮貌地斟水、收碟，我要俾個👍🏻👍🏻啲員工！