日日涮 (Closed)

旺角創興抵食多選擇火鍋放題最近喺旺角創興廣場六樓發現咗一間幾值得推薦嘅海鮮火鍋放題，佢叫做日日涮。喺兩個鐘入面可以任食豬肉同牛肉，海鮮種類都有好多，分咗兩層，有龍蝦、蟶子、扇貝、蜆、蠔、大蝦、鮑魚、沙白等，非常鮮甜，海鮮要煮七分鐘，蒸完開蓋香噴噴，急不及待要食。龍蝦好多膏，肉質爽口鮮甜；蟶子蒸到啱啱好，唔會韌；鮑魚都幾大隻下，好正！喺等海鮮熟嘅期間，我哋出去拎咗啲熟食，有中華沙律，涼拌青瓜雲耳同麻辣蓮藕，可以頂頂肚餓。蒸氣焗熟哂啲海鮮，海鮮嘅精華流哂落下面個南瓜肉碎粥入面，大家一定要試下！呢度嘅刺身都比到驚喜我，有三文魚、八爪魚、甜蝦、鮑片、榮螺、希靈魚、吞拿魚、帶子、赤貝、油甘魚同𩶘魚，三文魚夠哂肥美；希靈魚好爽脆。火鍋配料除咗丸類之外，其他種類都有好多，有炸魚皮、大生根、響鈴、魚腐、芝士腸、魚蛋、芥末貢丸、芝士魚豆腐等等；蔬菜種類都有好多，有蘿蔔、銀芽、翠玉瓜、雞脾菇、南瓜等，好健康！呢度嘅飲品亦都係我見過最多嘅，有成廿二種。我就最鍾意飲蘋果梳打。甜品都有成八款，一定有款啱我食；最後食埋條雪條，就好滿足！