青葉海鮮酒家 (青山公路 - 新墟段)

Open Now

Now Closed

做野辛苦，有時都要慰勞下自己，收工仲要煮飯好累的，落街食唔洗諗唔洗做有人招呼，我首選青葉海鮮酒家。椒鹽鮮魷$78，見到即刻開胃，因為賣相炸得金黄覺得會好味，會想像食薯片咁脆卜卜，食落口感又如何呢？真係堅炸得脆，即炸即上無放過時，因為試過等得耐先上桌，脆皮就會淋左，椒鹽又香又惹味，整支啤酒飲啱晒！呢度最出名的$10 東江走地雞，是一隻，不是例牌，街坊識得食一定來食，絕不欺場。雞肉好滑有雞味，肉質真係食過幾次都咁有口感，益街坊得來是高水準的，俾埋兩碟葱蓉你點，咸咸地餸飯一流！$58特價小菜，茄子豬軟骨煲，俾好多茄子落去煮，上桌時，茄子剛好夠淋，不會煮過龍，令我覺得呢度廚師真係有真材實料，掌握煮食時間很準確！而豬軟骨唔洗講，炆得好腍，骨都食晒，蒜蓉汁入味，呢個餸味濃d , 叫碟清清地的走地雞配合食，係我真心推介！之前係送糖水的，今晚太夜食，無晒糖水，部長送個椰汁紫米糕俾我地食，好香椰汁味，紫米煙韌有嚼勁，好味！又好開心！覺得招呼好好，好有親切感！所以真係要讚一讚呢d良心食肆，平價得來，明碼實價不取巧，一定再幫襯！