慢煮工業 (Closed)

經過呢間餐廳好似幾正，試吓先。撥開膠簾進入，簾後係一個小小空間，餐廳係喺樓上。爬完樓梯上到去，餐廳都幾大，不過就唔係全層開晒，我諗閒日午市佢只開一邊大約十零張枱。上到去1:40左右，午市接近尾聲但仍然幾多人。等候侍應帶位期間四圍望吓，喺門邊竟然見到一個人咁高嘅關公壇，真係估佢唔到，西餐都擺關公。除咗呢樣，其實餐廳裝飾擺設都正常嘅，似嗰啲新派cafe。我點咗西冷扒，餐湯係忌廉蘑菇湯，再加$8 要埋杯咖啡。個湯味道唔錯，佢最值得讚係夠熱，想喺香港搵碗熱湯唔係咁易㗎葉師傅。咖啡都好香濃，啲奶係泡沫，而且仲熱辣辣，做足功夫。不過個主角西冷扒就唔係好得，乾爭爭鞋烚烚，仲有啲靭。肉味係有，但唔特出，幾啖之後已經食唔出肉味。其實如果整得唔好食不如唔好慢煮啦，正常咁煎可能會好啲。唔知係咪得西冷係咁，或者有機會試吓其他。今餐埋單$117。食完先諗起原來我之前試過佢另外間分店，都怕有四、五年前，嗰陣睇咗報導去試。我差啲唔記得幫襯過，即係當時唔太impressed，我諗同我呢餐咁上下感覺。雖然唔太啱我，但呢啲餐廳都值得存在嘅。呢日正值情人節，就算晏晝流流都有兩三對小情人嚟慶祝，非常sweet sweet。