老爹

Open Now

Now Closed

今日嚟到呢間老嗲，呢間雖然話係西餐，但又有台式飲品。咁啱下午茶時段，下午茶同午餐其實主食一樣，分別只在於午餐多左餐包同餐湯，當然午餐價錢都會高d。叫左一個煎雞扒飯配秘制汁，雞扒皮脆肉嫩，煎得啱啱好。配菜並唔係一般餐廳用嘅雜豆，係紅蘿蔔同青瓜，不過唔好以為佢求其生切或者齋烚，係用蒜蓉炒過嘅，一d都唔求其，仲炒得幾好食。佢嘅秘制汁，其實就係豉油汁，呢個汁雖然我食唔出佢加左咩，總之就當係豉油。飲品係我嚟呢度例牌都叫嘅熱炭燒咖啡，平時我係唔點飲咖啡嘅，不過嚟親呢度就一定飲呢杯。佢嘅炭燒咖啡唔係得個名，係飲落堅係有炭燒味，好香、唔酸唔澀、入口有回甘，非常啱我口味。雖然佢呢度係除左普通餐廳嘢飲，仲有好多唔同款嘅台式飲品，但我強烈建議大家至少試一次炭燒咖啡！😋環境方面，呢度嘅空間好闊落，就算滿座都唔迫夾。地方乾淨整潔。佢有部分嘅燈係用唔同嘅煲嚟整嘅，呢方面幾有特色，其他就同普通餐廳一樣。