明苑粉麵茶餐廳 (Closed)

以前呢間茶餐廳係正我屋企樓下，所以周不時都會去食野。返學前黎食早餐，放學又食下午茶，不過搬左屋之後就好耐都無黎過。今日忽然諗起佢，就提議黎呢度食下懷緬一番。黎到既時候大概三點幾，餐廳無咩人，半滿都無，不過可能由於之後落大雨，所以突然間一大堆人湧入黎。雖然係下午茶時間，不過其實下午茶唔多選擇，都係一D麵包小食咁，但我好肚餓，所以最後都係叫左碗米粉食。我地分別叫左一碗牛什米，牛筋腩米，同埋一件我以前黎親都食既奶油多。呢度既奶油多依舊好食，多士夠薄同夠脆，煉奶牛油一D都唔吝嗇，食落去好濃牛油香，加埋甜甜既煉奶，真係非常好味。食既時候要小心，因為D奶油太多有時會滴到周圍都係。不過牛什同牛筋腩米就麻麻地，先講份量係夠大碗既，食完都飽哂。不過米粉唔係幾靚，食落有D粗糙既感覺，而且湯底亦唔夠香，味道比較淡。牛腩非常瘦下，好偶然先夾雜少少肥膏，幾靱下，好鬼(困)難食，好似食瘦肉咁食得好辛苦。牛肚夠淋，牛腸夠肥亦無異味，牛什係無咩大問題的。雖然佢未至於好難食，不過相比起旺角附近既餐廳其實佢唔算平，因為遠少少既樂園同一碗牛什米只係賣$12，而且亦都係唔差既。所以，下次未必會再黎啦。