沙田頭火鍋 (Closed)

星期日行完朗豪坊之後就諗住去食埋飯，行過路過見到有間叫做沙田頭嘅打邊爐，俾佢個餐廳名吸引咗入去。我哋趁天氣凍凍地，就叫咗個胡椒豬肚湯底，個湯底嚟到，非常足料除咗大量豬肚之外，仲好香胡椒味，唔使落配料先飲兩啖湯先。首先我哋嗌咗個炸雲吞小食醒醒胃先，炸得非常香脆可口，蝦肉亦都好彈牙。跟住重頭戲就嚟啦，我哋嗌咗牛小排，黑豚肉，鯇魚，魚片頭。牛小排非常之香，油脂分布得好平均，一咬落去除咗有牛既油花香後，仲有濃濃嘅肉味。黑豚肉雖然不過不失，但我好欣賞餐廳嘅心事，佢啲擺盤非常有心機。鮮滑三拼都係有驚喜，蝦滑，墨魚滑，牛肉滑真係唔係間間有，但真係好似平時去飲茶嘅牛肉球咁，本人非常之鍾意。最後，令我難忘嘅係個魚片頭，餐廳應該啱啱炸起個魚片頭，咬落去亦都非常之彈牙，亦都香魚味。整體嚟講，呢個真係我哋打邊爐嘅新蒲點，唔使成日食啲連鎖打邊爐，食吓一啲小店先係充滿人情味之選。