泰爸爸

Open Now

Now Closed

朋友放假，佢約我去到奧海城食飯。原來喺奧海城地下外圍，仲有咁多餐廳，朋友唔帶我去都唔知，最後我哋就揀咗間食泰國嘢嘅餐廳。呢間餐廳座位有室內同室外，因為落雨關係，我哋就揀咗坐裏面。室內環境燈光黃黃，坐得舒服。呢度都幾多嘢食，朋友叫咗泰式蝦餅、鮮蝦炒金邊粉同埋黃咖哩薯仔雞。呢度d泰式蝦餅個樣都幾特別，用返蝦嘅造型，切為細細件，一口一啖。蝦餅入口仲係熱，蝦膠打得幾好，食落好有質感，蝦味真實。旁邊個醬調味調得幾好，甜甜辣辣，蝦餅點埋個醬仲好食。鮮蝦炒金邊粉夠大碟，鮮蝦大隻，咬落彈牙爽口，金邊粉炒得幾好，唔會炒到散曬，入口又唔會油淋淋，酸酸地。加埋豆乾，雞蛋等配菜一齊食就覺得更加香。泰式黃咖哩薯仔雞份量正常，d雞細細嚿，食落唔鞋。黃咖哩味道幾好，甜甜哋，唔辣，幾香。裏面嘅配菜紅黃青椒同洋蔥都甜甜地，薯仔就炆得淋。只要咖哩味道做得好，基本上配乜都好好食。食晒d嘢仲有咖哩汁剩，所以我哋再叫左個泰式薄餅，即叫即整。呢個薄餅比較濕潤，唔會乾爭爭，煎得好香口，點埋咖哩汁食仲好味。