L.D.K. by Ufufu Café (新城市廣場) (Closed)

上次打風早收工，經過沙田新城市廣場見到有間日式西餐廳，但係打風原因餐廳早收，於是去咗隔離嗰間德國餐廳，心思思一直想試返間日式西餐廳，因為餐牌非常吸引，今日得有機會就過去試一試。平日夜晚7點去到唔使排隊，可以直接入座，我哋兩個人叫咗鵝肝漢堡鐵板，另外加咗個酥皮粟米湯、白飯同埋沙律＆日式咖哩豬扒蛋包飯，仲有甜品芒果芭菲。. 認真好耐未食過咁好味鵝肝，入口溶化，配上似係日式嘅甜燒汁，配埋白飯真係無得輸，好好味，呢間餐廳餐牌寫明用嘅係日本新瀉米，好有米香，果然係日本米，用料的確唔錯，仲有個酥皮粟米湯都好香牛油味，粟米超甜味濃。相比之下日式咖哩蛋包飯就比下去了，蛋好滑但唔覺有蛋香，入面的飯係加左香菇黎煮，個人比較喜歡茄汁飯，豬扒炸得香脆，外脆內軟啖啖肉，反而日式咖哩感覺上係一般超市貨色。最後梗係試埋佢哋餐牌最吸睛嘅甜品啦，原本想試蜜瓜班戟，可惜蜜瓜班戟係要下午兩點至五點先有，唯有改為芒果芭菲， 芒果一般唔算好甜，忌廉香滑，中層有啲脆米，底層係芒果味嘅啫喱，我個人唔係咁鍾意佢嘅口感，所以呢個甜品都係一般，下次要試返蜜瓜班戟先得。