紅堂 (Closed)

新開創意麻辣火鍋 ，坐得舒服，裝修走年青型格路線。花膠雞湯底好足料齋飲都好好味，同埋麻辣湯底亦都好夠香，香料同辣味比例啱啱好，唔係死辣。啲火鍋料睇得出有誠意，個西班牙豬梅肉加麻辣湯底簡直一流（我唔食牛所以評價唔到和牛，但同行朋友話好正）；紫菜響鈴一啲都唔油膩好似食緊炸紫菜咁；手打松露墨魚丸非常出色；其他配料亦都好ok。另外佢哋有幾多辣嘅小食甚至甜品，食咗個shake shake 酥肉，麻辣雞翼-送啤酒一流。 另外仲有醋青瓜同麻醬冰菜，個青瓜酸酸甜甜用來中和麻辣火鍋嘅油膩實在太正。最後仲有叫咗兩個好特別嘅甜品，一個係辣辣地嘅朱古力火鍋同埋拔絲糍粑，都係有誠意之作。所有同行朋友都好滿意。溫馨提示：食物份量偏細，所以比較好適合追求高質麻辣邊爐嘅人。