喜運點心專門店 (Closed)

石門站對出有一間專食點心嘅舖頭，中式裝修，木枱木凳，門口仲有個外賣快線，方便叫外賣。今日得閒就坐低慢慢嘆茶，呢度就冇得揀飲咩茶，一律都係壽眉，茶錢每位$3，不過我就冇乜所謂嘅，食物選擇方面都有幾十款，除散叫點心，仲有孖寶套餐，可以蒸飯孖寶或者腸粉孖寶。今日就試咗個明爐叉燒滑腸粉拼喜運鮮蝦餃，腸粉都係三條，叉燒餡料OK啦。至於蝦餃，都係一籠四粒，啲蝦都新鮮大隻。懷舊糯米雞（ $29 ）糯米雞都好大舊，熱辣辣蒸出嚟好正，裏面有成隻雞翼，另外有叉燒、瘦肉、鹹蛋黃等，都好味呀。蒜香鮮蝦春卷（$28），呢個我覺得做得唔錯好脆口唔會油，一碟四條，good!奶黃千層糕（$22），呢個相當特別，同我食開嘅千層糕好唔同，佢中間係奶黃質料同時又加咗有啲合桃之類嘅材料，應該屬於甜品，但係又唔會太甜。點心似乎都係即叫即蒸，新鮮出爐當然好味，我覺得同酒樓質素有得揮！仲要唔洗加一！另外呢度有明火精選靚燉湯，寫明不含味精，星期一至日每日有兩款可選，今日係椰子粟米蜜棗雞腳燉上肉或者土茯苓赤小豆薏米燉響螺，一盅$38 。我哋決定試晒兩款，椰子湯比較清甜，粟米、雞腳、瘦肉齊晒了。而另一款土茯苓燉湯，雖然個樣黑孖孖，睇落好