極品刺身 (恆勝樓)

Open Now

Now Closed

第二次寫這家外賣壽司店的食評，上次比較粗疏，今次認真點。想買餐日本嘢返屋企食，唔想去到旺角，最方便就係九龍城。小店格局，但選擇其實幾多。最開心係有即開生蠔，有法國蠔，但係當然選日本啦。統一啲。另外見到有幾條魚。一個人本來都唔諗住開條魚，但係又見幾靚，同埋細條池魚都係$98，咁試吓啦。師傅好有心機，片到好薄。返到屋企喇～九州下關生蠔：爽口、鮮甜、海水味不重、沒有金屬味，屬於清新型。我特別要求跟酸汁食，更有日式感覺。池魚有魚味，好多肉。特製的酸汁好得！包含了薑蓉同蔥，加好多分，下次見面要讚揚下店長。魷魚也是餐牌以外的特色貨，無記錯 $12蚊 一片，都係高質素。馬刀背則一貫的超級爽口但無乜味。玉子手卷、蔥吞拿魚蓉手卷、海膽手卷、壽司都正常，飽肚之選。送味增湯、啫哩，都係用保鮮紙包好唔會漏水。豐富的一餐：在家可以安心慢慢食，嘆杯靚白酒，唔使擔心泊車揸車，另有一番享受。