心夜來潮 (Closed)

同成班朋友食飯， 淨係諗食咩，成日都諗到頭都大埋，咁啱見到網上有人介紹旺角嘅呢一間心夜來潮， 評價都似乎唔錯， 一於去試下。非常多選擇，樣樣都好想試，真係好苦惱。見到每枱客都有嗌嘅醬滷鵝腸，食落非常肥美，醬汁香濃，但係唔會太鹹，而且鵝腸好 爽脆 ，非常新鮮。打冷當然要叫鴨蛋炸蠔餅啦，呢度嘅蠔餅都相當出色，炸得啱啱好，唔會太油膩，而且每粒蠔仔都好大粒，非常肥美鮮味。我哋仲叫咗個卜卜蜆煲，每粒花甲都好大隻 ，每隻都大過個五蚊銀 ，肉質鮮甜， 湯底就用咗粟米粉絲芹菜等等， 加埋蜆嘅甜味 ，令個湯都好好飲， 忍唔住清曬啲湯。而呢一個原隻土窯手撕雞，係即叫即蒸 ，用咗荷葉包實原隻雞，雞肉鮮嫩肥美 ，好香嘅香料味，撈飯一 底 流。主食方面，我哋就叫咗呢一個沙鍋潮州粥，可以選擇唔同嘅配料，加入粥底。我哋就選擇咗肉蟹鮮蝦同咸豬骨， 肉蟹非常多膏， 肉質好甜 ，蟹膏融入粥底，令到個粥底變得金黃色，而且鮮蝦都非常彈牙爽口， 加埋鮮甜嘅粥，令人忍唔住一碗接一碗咁食。成餐 都食得好豐富好飽，不過圍返都係每人二百蚊鬆啲， 以旺角嚟講，仲食到咁多海鮮，呢個價錢都幾抵食。