Plato Cafe & Bistro (彌敦道) (Closed)

每年5月又係約閨密食生日飯既時候，上次食過左敦分店返尋味，今次就返交收就去油麻地分店試下。原來係間油店入面，但地鐵站一出就係，好易搵。兩個女仔唔想咁heavy就點左我最愛豬手同埋一個魚。兩個都係套餐包湯同飲品，個湯係南瓜湯，配上蒜蓉包，主菜先黎左個魚，好大塊，煎到外層香脆，入面又唔會好乾好散，配埋個汁仲正，啲配菜薯仔都有調味，個沙律都有沙律汁，一點都唔馬虎。豬手上枱仲勁，超大份，已經起晒肉切好晒，啲肉好冧，有啲位會有焦香，啲皮都好好味唔會好肥咁。兩個女仔都清得晒。最後係個心太軟，即叫即做，最近成日想食甜野，呢度個心太軟焗到剛剛好，仲有ice cream同cream,咁個雪糕好似無溶得咁快，最後都傾到10:30人地收工先走，呢度空間感幾好，唔會好迫，所以同朋友邊食邊傾計都幾好。