裕鵝莊 (Closed)

本來老公訂枱兩位，夜晚七點半。去到前面都有啲訂枱客人，等安排入座。跟住阿姐就攞塊膠板，楝喺四人枱中間，指示前面已訂枱嘅男女入座。嗰個楝咗版嘅二人位，乜都放唔到。前面嗰對男女坐低咗都起返身。然後阿姐示意我哋坐落去，我哋唔坐，佢就叫我哋出門口等吓，當時仲有三張四人枱，一大個六人枱卡位。佢話有客訂咗。其實我哋同前面嗰對男女都有訂枱，但係就逼我哋整塊膠板搭枱坐。「冇㗎喇你哋出門口等啦」「訂咗枱我都係得呢啲位」你啲嘢係咪最好食我就唔覺得，但係咁樣安排座位，真係激嬲晒啲客。我去茶餐廳冰室，坐得迫迫地我預咗嘅。如果我係walk in,係得嗰個位，咁我自己揀。但係你焗我哋兩台咁樣搭枱迫埋一齊，咁就免嘞。佢呢個價錢，既可以食好嘢，應該可以坐得好少少。為免受氣，我哋走咗唔要張枱，獲得「已缺席」。唔緊要嘅，祝你客似雲來，瀨粉淨食唔該。