意料之外 (Closed)

媽住係附近幾年都未食過呢間餐廳，此店逢星期日休息，所以更令我對此店有所期盼，前幾篇食評都話蒜蓉牛油多士好味。端午節我地揀左唔食糉，路過此店，且早上11:15 竟然仲有早餐食，我成朝仲未有野落肚，當然立即去試。我同媽都點左早餐A - 火腿通粉配西煎雙蛋及蒜蓉牛油多士，我飲熱奶茶。蒜蓉牛油多士:  好香、好蒜，蒜味好豐富，擦左牛油蒜味更突出，但多士邊好林，軟身，唔夠脆，可能多士製作時放耐左。西煎雙蛋: 一份煎得靚仔，兩隻太陽蛋， 另一份o既其中一隻蛋就煎差左了，失色左啲。煎蛋味道冇特別。 火腿通粉: 通粉煮得唔夠林，硬左啲，相信煮好焗多一、二分鐘就剛剛好了。火腿絲屬正常。湯底同快餐店湯底冇乜分別，我同媽用餐後15分鐘就勁口渴，即落左好多味精了。熱奶茶夠滑，如果加多少少茶葉，相信茶味會更芳香。我欣賞此店o既裝飾或餐牌上有好多正面o既鼓勵金句，但食物o既質素也好重要。相信食左好味的食物，配以正能量，成個人晒。