Grom (Closed)

大熱天時行過雪糕店，不過A姐今日唔係太方便，所以有得睇無得食；1個月後，A姐又行過雪糕店，但今日都係唔方便，所以有得睇無得食。唔知大家覺唔覺，平時好人好者，好似唔會見到雪糕店，但當你個日唔方便，肚痛都不得了，雪糕店好似總係會喺你隔離出現。特別係近年，多咗好多高質，聲稱係用純果汁或新鮮生果制成嘅雪糕雪條，望住唔多顏色唔同種類嘅雪條，真係好吸引呀！呢間喺中環IFC嘅Grom，聽講係意大利名牌，真係唔方便都忍唔住要試試喇！店入面嘅原材料、製作機器、器皿等，都係由意大利入口，再喺旁邊嘅「實驗室」即場新鮮製作，無防腐劑、無色素，完全係100%純天然㗎，所以越食越健康啦。而口味方面，每個月都會變，所以我一定要就啱方便嘅日子，每個月都要嚟試晒唔同嘅口味。士多啤梨雪條 Ghiacciolo：呢條Ghiacciolo酸酸甜甜，好清新呀！最重要係，真係用上新鮮生果，味道唔會話好假，而且冰感十足，立即降溫呀！意大利雪糕 Gelato：至於雪糕Gelato我哋選擇咗芒果同啤梨口味，因為用上新鮮水果，所以食落非常creamy，但又唔會溜，而且仲見到一粒粒嘅啤梨核，真係好真實，好有口感呀！