鮮‧港式串燒吧 (Moved) New Location

又到覓食時間，今餐殺入觀塘工廈區，呢度勝在選擇夠多，呢次就揀咗喺駱駝漆大廈3座嘅 鮮·港式串燒吧。設計簡約，主要採用黑白两色，帶工業風，座位都算闊落，坐得舒適。天氣熱，胃口不大，就簡簡單單挑幾款食物。先來個牛仔骨($38)，燒得外脆內軟，火候啱啱好，沾一點點海鹽，非常惹味。跟住清清哋嚟個燒豆角($15)，保持到豆角原味之餘，又去其青澀，不俗。再嚟一份阿拉斯加蟹腳($198)，燒海鮮時間掌握十分重要，同時要保留鮮味又要顧及口感。一啖咬落，食到阿拉斯加蟹嘅清甜滋味，唔使配任何醬料，味道啱啱好。最後上嘅芝士煙肉蘑菇($38)，咬落好juicy，又有芝士同煙肉嘅鹹香，值得一試。其實呢度選擇好多，除咗海鮮、肉類、蔬菜可以串燒之外，仲有炸物、特色小食同甜品，下次叫多幾個 friend 嚟，就可以燒餐勁。